പ്രൊമാത്ത്യൂസ്സ്

മനുഷ്യരാശിയ്ക്ക് വേണ്ടി ഏറ്റവും അധികം വേദന സഹിച്ചവൻ; മനുഷ്യരുടെ പുരോഗതിയ്ക്ക് വേണ്ടി നൂറ്റാണ്ടുകളോളം ചങ്ങലയിൽ കിടന്ന് ജീവനോടെ ഭക്ഷിയ്ക്കപ്പെടുന്ന പ്രാണവേദനയിൽ പിടഞ്ഞ ഗ്രീക്ക് അർദ്ധദൈവം പ്രൊമാത്ത്യൂസ്സ്.

ഹൈന്ദവപുരാണങ്ങളിലേത് പോലെ തന്നെ ദൈവങ്ങളും പ്രതിദൈവങ്ങളും, അംശദൈവങ്ങളും, ദൈവങ്ങളല്ലാത്ത ദൈവപുത്രന്മാരും ഗ്രീക്ക് പുരാണങ്ങളിലും നിറഞ്ഞ് നിൽക്കുന്നു.

ഗ്രീക്ക് ഇതിഹാസ കഥകളിൽ രണ്ട് നിര ദൈവങ്ങൾ ആണുള്ളത്.

ഒന്ന് ടൈറ്റൻസ്സ് : എന്ന ആദി ദൈവങ്ങൾ
രണ്ട് ഒളിമ്പ്യൻസ്സ് : ടൈറ്റൻസ്സുകളുടെ മക്കളും പിന്നീടവരെ തോൽപ്പിച്ച് അധികാരം നേടിയവരുമായ പിൽക്കാല ദൈവങ്ങൾ.

ആദിദൈവങ്ങൾ യുറാനസ്സിനും ഗ്ഗായെയ്ക്കും ഉണ്ടായ 6 ആണ്മക്കളും 6 പെണ്മക്കളുമാണ്. ടൈറ്റൻസ്സ് എന്നറിയപ്പെട്ട ആണ്മക്കൾ

ക്രോണോസ്സ്,
ലാപെറ്റസ്സ്,
ഹൈപോറിയോൺ,
ഓഷ്യാനസ്സ്,
കോയെസ്സ്,
ക്രെയസ്സ് എന്നിവരും

ടൈറ്റാനസ്സ് എന്ന പെണ്മക്കൾ

ഥിയാ,
ഋയാ,
മ്നെമോസൈൻ,
ഫോബെ,
തെതിസ്സ്,
തെമിസ്സ്

എന്നിവരുമാണ്.

ക്രോണോസ്സ് ഏറ്റവും ഇളയവൻ ആയിരുന്നെങ്കിലും മറ്റു സഹോദർന്മാരെ പോലെ ആയിരുന്നില്ല, അധികാരമോഹിയായ അവൻ പിതാവ് യുറാനസ്സിനെ ഒരു അരിവാളുപയോഗിച്ച് വധിച്ച് ലോകത്തിന്റെ ഭരണം കൈപ്പിടിയിലൊതുക്കി. എല്ലാ സഹോദരന്മാരും ഓരോരോ സഹോദരിമാരെ വിവാഹം കഴിച്ചപ്പൊൾ ക്രോണസ്സും സഹോദരി ഋയായെ വിവാഹം കഴിച്ചു. അവളിൽ ഹെസ്റ്റിയാ, ഡെമെറ്റർ, ഹേറ, ഹേഡ്സ്സ്, പോസെഡോൺ, സ്യൂസ്സ് എന്നീ മക്കളും ചൈറോൺ ഫിലൈറ എന്ന മത്സ്യകന്യകയിലും പിറന്നു.

ചരിത്രം ആവർത്തിച്ച് കൊണ്ട് ക്രോണോസ്സിന്റെ ഇളയമകൻ സ്യൂസ്സ് പത്ത് വർഷം നീണ്ട യുദ്ധത്തിനൊടുവിൽ പിതാവിനെ തോൽപ്പിച്ച് അധികാരം പിടിച്ചെടുത്തു. സ്യൂസ്സ് ജനിച്ചപ്പോഴേ ക്രോണോസ്സിനറിയമായിരുന്നു അവൻ പ്രശ്നമാണെന്ന്; അതിനാൽ അവനെ വധിയ്ക്കുവാൻ ആഗ്രഹിച്ചു എന്നാൽ ഋയാ മകനെ ഡിക്ടാ മലകളിലെ ഒരു ഗുഹയിൽ ഒളിച്ച് വളർത്തി. ഹേഡ്സ്സ് ഇരുട്ടീന്റെ മറയാൽ ക്രോണോസ്സിന്റെ ആയുധങ്ങൾ തട്ടിയെടുത്തു, പോസെഡോൺ ഒരു തൃശൂലവുമായി അച്ഛനെ നേരിട്ടു, ആയുധങ്ങൾ നഷ്ടപ്പെട്ട് ഒരു മകനുമായി യുദ്ധം ചെയ്യുന്ന അച്ഛനെ സ്യൂസ്സ് മിന്നൽ കൊണ്ട് നിലമ്പരിശ്ശാക്കി. ഭൂമിയും സ്വർഗ്ഗവും സ്യൂസ്സ് ഭരിച്ചു, സൈക്ളോപ്പ്സ്സിനും, ഹേഡ്സ്സ്, പോസെഡോൺ എന്നിവർ വരുതിയിലാക്കിയ എല്ല ജീവികൾക്കും, രാക്ഷസർക്കും കരുത്ത് കൂട്ടി. അവർ ബാക്കിയുള്ള ടൈറ്റൻസ്സിനേയും കീഴ്പ്പെടുത്തി. ഒളിമ്പസ്സ് മലനിരകളിൽ ആസ്ഥാനമാക്കിയ രണ്ടാം നിര ദൈവങ്ങൾ ഒളിമ്പ്യൻസ്സ് എന്ന പേരിൽ ലോകം ഭരിച്ചു.

ഒളിമ്പ്യൻസ്സിൽ ഏറ്റവും ശക്തൻ പോസെഡോൺ ആയിരുന്നു, സമുദ്രത്തിനും, ഭൂമിയ്ക്കും, ജന്തുക്കൾക്കും അധിപൻ. ഭാരതീയ പുരാണങ്ങളിൽ സൂര്യൻ ശക്തനെങ്കിലും, മിത്രൻ ദേവരാജാവായത് പോലെ, സ്യൂസ്സ് ദേവരാജാവായി.

ഇനി നമുക്ക് ഒളിമ്പ്യൻ ദൈവങ്ങളെ ഒന്ന് പരിചയപ്പെടാം, എന്നിട്ട് പ്രൊമാത്യൂസ്സിലേയ്ക്ക് പോകാം.

1. പോസെഡോൺ, സമുദ്രവും ഭൂമിയുമുള്ളാതിനാൽ, സുനാമിയും, ഭൂകമ്പവുമൊക്കെയാണ് കയ്യിലുള്ളത്, ആയുധം തൃശൂലവും, നമ്മുടെ രുദ്രനും, വരുണനും ചേർന്ന ഒരു ശക്തി.

2. സ്യൂസ്സ്, ദേവേന്ദ്രൻ, അകാശത്തിനധിപൻ അതിനാൽ തന്നെ മിന്നൽ ആണ് അയുധം.

3. അപ്പോളോ, വെളിച്ചത്തിന്റെയും സംഗീതത്തിന്റേയും ദേവൻ, സ്യൂസ്സിനു ലെറ്റോയിൽ പിറന്നവൻ. നമ്മുടെ സൂര്യദേവൻ.

ഇവരാണ് ദേവന്മാരിൽ പ്രമാണികളും, ശക്തരുമായ മൂന്ന് പ്രധാനികൾ

4. അഥീന, വിദ്യയുടേയും, ശസ്ത്രത്തിന്റേയും ദേവി.സ്യൂസ്സിനു മെറ്റിസ്സിൽ പിറന്നവൾ. നമ്മുടെ സരസ്വതിദേവി.

5. ഹേഡ്സ്സ്, തമസ്സിന്റെ ദേവൻ, മരണദേവൻ. നമ്മുടെ യമധർമ്മൻ.

6. ഐറിസ്സ്, യുദ്ധ ദേവൻ, സ്യൂസ്സിനു ഹേറയിൽ പിറന്നവൻ.

7. ആർട്ടമസ്സ്, ചന്ദ്രദേവത

8. ഹെഫൈസ്റ്റസ്സ്, അഗ്നിദേവൻ

9. ആഫ്രോഡൈറ്റ്, പ്രണയദേവത

10. ഹെർമ്മസ്സ്, ധനദേവൻ, കുബേരൻ

ശരി നമുക്കിവിടെ നിർത്താം, ഇനിയുമുണ്ട് ദേവന്മാരും ദേവിമാരും, കൃഷിയ്ക്കും, സമയത്തിനും, വിവാഹത്തിനും, രാത്രിയ്ക്കും, പ്രതികാരത്തിനുമൊക്കെ വെവ്വേറേ...

ലെപ്റ്റസ്സിനും ഒഷ്യാനൈഡ് ക്ള്മീനിനും ഉണ്ടായ 4 മക്കളിൽ ദീർഘദർശി അഥവാ മുങ്കൂട്ടി കണ്ട് പ്രവർത്തിയ്ക്കുന്നവൻ, ബുദ്ധിമാനായ പ്രമത്യൂസ്സും, എല്ലാം കഴിഞ്ഞതിനു ശേഷം പ്രവർത്തിയ്ക്കുന്ന, ബുദ്ധിശൂന്യതയുടെ പ്രതീകമായ എപ്പിമാത്യൂസ്സും മനുഷ്യരുടെ അഭ്യുദയകാംഷികളും, പുരോഗതിയുടെ നായകരും ആയിരുന്നു. പഞ്ചതന്ത്രത്തിലെ അനാഗതവിധാതാ, യദ്ഭവിഷ്യൻ എന്നീ മത്സ്യങ്ങളുടെ സ്വഭാവം ഇവരിൽ കാണാവുന്നതാണ്.

മനുഷ്യർ ഭൂമിയിൽ യാതൊരു പുരോഗതിയുമില്ലാതെ, മൃഗങ്ങളെ പോലെ കാട്ടിൽ പഴങ്ങളും, ഇലകളും, കിഴങ്ങുകളും, പച്ചമാംസവും കഴിച്ചും, വന്യമൃഗങ്ങളാൽ വധിയ്ക്കപ്പെട്ടും അവയ്ക്ക് ആഹാരമായും ജീവിച്ചു വന്നു. ആ അവസ്ഥയിൽ അവരോട് സഹാനുഭൂതിയും, അവർക്ക് മികച്ച ജീവിതസൗകര്യങ്ങളും, സുരക്ഷയും കൊടുക്കണമെന്ന ആഗ്രഹവും ഉള്ളിൽ നിറഞ്ഞപ്പോൾ പ്രമാത്യൂസ്സ് അതിനുള്ള വഴി ആലോചിച്ച് കണ്ടെത്തി. അഗ്നിയാണ് എല്ലാ പുരോഗതിയ്ക്കും കാരണമെന്ന് തിരിച്ചറിഞ്ഞ സീയൂസ്സ് ഓളിമ്പസ്സിൽ അഗ്നിയെ സുരക്ഷിതമായി സൂക്ഷിച്ചിരുന്നു, ഇത് മനുഷ്യർക്ക് നൽകിയാൽ അവരുടെ പുരോഗതി തനിയെ ഉണ്ടായിക്കൊള്ളുമെന്ന് തിരിച്ചറിഞ്ഞ പ്രമാത്യൂസ്സ് അഗ്നി അപഹരിച്ച് മനുഷ്യർക്ക് നൽകി. തനിയ്ക്ക് അത് മൂലം സംഭവിയ്ക്കുവാൻ പോകുന്ന ദുരിതങ്ങൾ ദീർഘദർശ്ശിയായ അദ്ദേഹം മുങ്കൂട്ടി കണ്ടിരിയ്ക്കാം; എങ്കിലും ആരെങ്കിലും ആ യാതന സഹിയ്ക്കാതെ മനുഷ്യരാശിയ്ക്ക് പുരോഗതി ഇല്ല എന്നറിവിൽ സ്വയം ദുരിതം ഏറ്റെടുത്തതാവണം.

അഗ്നി ലഭിച്ച മനുഷ്യർ ആഹാരം പാകം ചെയ്ത് കഴിയ്ക്കുവാനും, അഗ്നിയാൽ വന്യ മൃഗങ്ങളെ ഭയപ്പെടുത്താനും, ലോഹങ്ങൾ ഉരുക്കി ആയുധങ്ങളും, പടച്ചട്ടകളും ഉണ്ടാക്കുവാനും ആരംഭിച്ചു, അവർ ദൈവങ്ങളെ പോലെ കരുത്തരും, സുഖസകര്യങ്ങൾക്ക് ഉടമകളുമായി. അത്ഭുതപ്പെട്ട സീയൂസ്സ് കാരണം കണ്ടുപിടിച്ചു പ്രമത്യൂസ്സിനെ ശിക്ഷിയ്ക്കുവാൻ തീരുമാനിച്ചു. പ്രമാത്യൂസ്സിനെ പിടികൂടി ഒരു പാറയിൽ ചങ്ങലയാൽ നഗ്നനായി ബന്ധിച്ചു, തന്റെ കഴുകനെ അയച്ച് ദിവസവും പ്രമാത്യൂസ്സിന്റെ കരളു കൊത്തി തീറ്റിച്ചു. രാത്രിയിൽ കരൾ വീണ്ടും വളർന്ന് പൂർണ്ണ രൂപത്തിലെത്തും, പകൽ വേണ്ടും കഴുകനെത്തി അത് ആഹരിയ്ക്കും, ഇങ്ങനെ പച്ചയ്ക്ക് തന്നിലെ മാംസം തിന്ന് തീർക്കപ്പെടുന്ന പ്രാണവേദനയിൽ പ്രമാത്യൂസ്സ് നൂറ്റാണ്ടുകൾ കഴിഞ്ഞു കൂടി.

ഒടുവിൽ ഒരു ദിവസ്സം ഹെർക്കുലീസ്സ് അത് വഴി വരുകയും, അമ്പെയ്ത് കഴുകനെ വധിച്ചും, ചങ്ങല തകർത്തും പ്രമാത്യൂസ്സിനെ രക്ഷിച്ചു.

പ്രമാത്യൂസ്സിന്റെ ഭര്യ പൈറ ആണ് ഇക്കാലത്ത് കാണുന്ന മനുഷ്യരെ സൃഷ്ടിച്ചതെന്നും പറയപ്പെടുന്നു. അദ്ദേഹത്തിന്റെ മകനായ ഡ്യൂക്കലിയൺ ആൺ`ഗ്രീക്ക് കഥകളിലെ മഹാപ്രളയകാലത്ത് പേടകം ഉണ്ടാക്കി സർവ്വചരാചരങ്ങളേയും കയറ്റി 9 ദിനരാത്രങ്ങൾ തുഴഞ്ഞ് ഉയർന്ന പർവ്വതനിരയിലെത്തിച്ച് രക്ഷപ്പെടുത്തിയത്. പാശ്ചത്യരുടെ ഗവേഷണങ്ങൾ പ്രകാരം ബി.സി. 10,000 നും 7,000 നുമിടയിൽ നടന്ന ഈ മഹാപ്രളയകഥ ബൈബിളിൽ നോഹയുടെ പേടകമായും, ഖുറാനിൽ നൂഹ് നബിയുടെ വഞ്ചിയായും, മത്സ്യപുരാണത്തിലെ സത്യവൃതമനു എന്ന രാജാവും കപ്പൽ പണിതും എല്ലാ ജീവികളേയും രക്ഷിയ്ക്കുന്നു എന്ന പൊതുഘടകം രസകരമാണ്.

ചുരുക്കത്തിൽ ഗ്രീക്ക് ഇതിഹാസങ്ങളിൽ മനുഷ്യന്റെ എല്ലാ പുരോഗതിയ്ക്കും കാരണക്കാരൻ, ഒരു പക്ഷേ ചരിത്രത്തിലെ ആദ്യത്തെ മെക്കാനിക്കൽ എഞ്ചിനീയർ, പ്രമാത്യൂസ്സ് എന്ന ടൈറ്റൻ ആണ്, അതിനാൽ നമുക്ക് ആ പേരിലുള്ള വാച്ച് അഭിമാനത്തോടെ ധരിയ്ക്കാമെന്ന് തോന്നുന്നു; മുങ്ങിപ്പോയ കപ്പലിനെ മറക്കാം..

പാഥേയം എന്ന ചിത്രത്തിൽ ചെറിയ വ്യത്യാസങ്ങളുണ്ടെങ്കിലും ( രാത്രി കരൾ ഭക്ഷിയ്ക്കുകയും, പകൽ വളരുകയും ചെയ്യുന്നു) മനോഹരമായി ഇത് അവതരിപ്പിച്ച ഗാനം കേൾക്കാം...

https://www.youtube.com/watch?v=5tjDP8hRuhc